NMG-ის კორპორატიული სოციალური პასუხისმგებლობის (CSR) მიმართულებით განხორციელებულ განათლების მხარდაჭერის პროექტს კიდევ ორი საჯარო სკოლა დაემატა. ამჯერად ინიციატივა მესტიის მუნიციპალიტეტში გაგრძელდა და სოფელ ლატალისა და სოფელ მულახის სკოლები მოიცვა.

სკოლებს საჩუქრად გადაეცა პერსონალური კომპიუტერები და ბიბლიოთეკისთვის განკუთვნილი წიგნები, რაც სასწავლო პროცესის ყოველდღიურ მხარდაჭერას ემსახურება და არა – ერთჯერად ეფექტს. მოსწავლეებს კი ინდივიდუალური სასკოლო საჩუქრები დაურიგდათ.

პროექტი რამდენიმე წელია მიმდინარეობს და მისი ძირითადი მიზანი საქართველოს სხვადასხვა რეგიონში არსებული საჯარო სკოლების მხარდაჭერაა. ინიციატივა ეტაპობრივად ფართოვდება და სხვადასხვა მუნიციპალიტეტში იმ სკოლებს მოიცავს, სადაც საგანმანათლებლო რესურსებზე წვდომა გაძლიერებას საჭიროებს.

NMG-ის CSR მიმართულება განათლებას განიხილავს, როგორც გრძელვადიან ინვესტიციას, რომელიც პირდაპირ უკავშირდება რეგიონების განვითარებასა და მომავალ თაობებზე ზრუნვას. სწორედ ამ ხედვის ფარგლებში პროექტი მომავალშიც გაგრძელდება და კიდევ უფრო მეტ სკოლას მოიცავს.